Anane pacoban pandhemi korona rong taun kepungkur, njalari samubarang kagiyatan mampet. Becik kagiyatan kang ana ing sajrone masarakat utawa sakubenge pendhidhikan. Salah sawijine yaiku kagiyatan saka mahasiswa kang dimandhegani dening Badan Eksekutif Mahasiswa, Fakultas Bahasa lan Seni, Universitas Negeri Surabaya. Adicara kanthi sebutan FBS Carnival kang sadurunge mung dilaksanakake lumantar daring. Nanging, FBS Carnival taun iki bisa dilaksanakake luring ing dina Ahad (30/10/2022).
Kabeh program studi saka Fakultas Basa lan Seni padha melu kanthi gayeng. Maneka werna busana lan paesan kang dadi titikane saben jurusan. Wiwit saka Jurusan Basa lan Sastra Dhaerah dhewe nganggo kebaya khas wanita lan priya Jawa. Ana uga saka jurusan Pendidikan Basa lan Sastra Jepang nganggo busana tradhisional Jepang yaiku yukata, meragake paraga anime kaya Umaru, Kaito Kuroba, Mei-mei, lan sapiturute. Saliyane iku ana saka Jurusan Sendratasik kang njupuk tema mistis. Ana kang macak lan meragakake pocong, valak, lan paraga medeni liyane.
Ana kang narik kawigaten saka Jurusan Basa lan Sastra Dhaerah (JBSD) yaiku wiwit saka busana, maneka piranti kang digawa, tetembangan kang ditembangake saben mlaku, unen-unen yel-yel, lan gugur gununge. JBSD nganggo busana kaya kratonan kanggo sepasang bebojoan, ana kang nganggo busana tari gandrung, lan disusul kanggo para mahasiswa kang dudu dadi sesulih nganggo busana ireng coklat susu. Piranti kang digawa yaiku wayang, saperangan gamelan, lan banner kanthi sesanti “Jawa Nyawiji, Jawa Njawa Njawani, JBSD Jaya Salaminya”. Nembangake tembang-tembang Jawa lan ora lali yel-yel kang rinakakit gampang kanggo diunen. Nalika Jurusan Basa lan Sastra Dhaerah mubengi kampus, ora kalah gayeng tinimbang liyane. Apa kang ditembangake rata-rata tembang dolanan kaya Prau Layar, Gundhul Pacul, lan ana lagu iwak peyek kang cakepane diganti nyakup JBSDne.
Mubengi kampus, para mahasiswa Jurusan Basa lan Sastra Dhaerah katon sumringah. Para mahasiswa nggugah rasa semangat wis kaya mawa, senadyan hawa panas nyengit. Nanging tansah gayeng nyengkuyung adicara nganti pungkasan. Swasana rame lan kompak saka para mahasiswa nalika nembang bebarengan tembang-tembang dolanan diiringi gamelan. Sawise mubengi kampus, ana suguhan penampilan saka JBSD yaiku Komunitas Bharada lan Tim Modern Dance kang kepengker menang juwara loro sajrone lomba Space BEM FBS. Jurusan liya nganti akeh kang padha ngrekam saka kekompakan lan kehebohan saka JBSD wiwit pawai lan suguhan penampilan. Ati wis tumancep rasa bungah lan bangga amarga Jurusan Basa lan Sastra Dhaerah iki bisa narik kawigaten.
Jenenge mahasiswa ana wae sesebutan utawa gelar kanggo paraga pawai wektu iku. Salah sawijine yaiku "Paduka Danang’’ julukan kanggo dhosen Jawa uga Pembina Kemahasiswa HMJBSD yaiku Bapa Danang Wijoyanto. Pantes wae yen diarani kaya mangkono, amarga busanane pancen beda karo dhosen liyane. Busana kanggo Pak Danang kaya raja-raja sajrone drama Korea jaman Joseon. Bapa Danang nalika disawang uga kelingan sajrone paraga Korea kang lagi meragakake drama jaman kerajaan Joseon utawa asring diarani cheonha. Kang narik kawigaten saka busanane Bapa Dhosen Danang,
beda tinimbang liyane yaiku dadi maskot Jurusan Basa lan Sastra Dhaerah. Dadi bisa ndadekake JBSD nduweni pamikiran kang liar tinimbang jurusan liyane.
Kagiyatan FBS Carnival 2022 iki nggugah paseduluran saka mahasiswa angkatan 2022, 2021, 2020 lan para bapa ibu dhosen sarta tendhik. Sawise rong taun pacoban kang misah panggonan. Kanthi rasa sokur, bungah, lan sumringah Jurusan Basa lan Sastra Dherah ngerah juwara siji Parade paling becik. Muga ora mung ana ing kagiyatan iki pasedulurane, nanging salawase.
Panulis : Kuni Auliya Rahmah lan Seva Kristina Wulandari
Comentarios