Senen Kliwon, 4 Maret 2024 dadi seksi acara Nganggara sepisanan ing periodhe 2024 iki. Nganggara yaiku wangsalan saka “Wadhah kanggo Ngaji lan Nggagas Sastra Jawa”. Nganggara iki minangka wadhah kanggo nambahi sesurupan babagan karya sastra Jawa sing biyasane dilakoni saben dina Selasa minggu keloro saben sasine. Acara iki biasane dilaksanakake karo komunitas sing jenenge Jawi Swara, yaiku salah sawijining komunitas sing ana ing prodi Pendhidhikan Basa lan Sastra Jawa UNESA. Jawi Swara iki bergerak ing bidhang sastra, warta, lan budaya Jawa sing ana ing sakupengane Universitas Negeri Surabaya.
Kolaborasi Sanggar Bharada lan komunitas Jawi Swara ing Nganggara sepisanan iki dadi hal sing mirunggan. Sanggar Bharada kasil mbiyantu Jawi Swara kanggo ngerameni acara Nganggara kala wingi kanthi cara nglakoni wayangisasi geguritan. Wayangisasi geguritan yaiku pengembangan saka pertunjukan wayang lan geguritan sing dilakoni dadi siji. Wayangisasi geguritan dilakoni kaya ngendalikake wayang biasane. Nanging sing beda ana ing pocapan swarane. Swara sing biasane diucapake dhalang bakal diucapake penggurit karo macakake guritane.
Guritan sing diwacakake penggurit nalika Nganggara kala wingi dipilih saka Buku
Antologi Geguritan Gagrag Anyar: GAMAN. Buku antologi geguritan kuwi dipacak dening PPSJ. PPSJ yaiku singkatan saka “Paguyuban Pengarang Sastra Jawa Surabaya” sing dipandhegani dening Bapak Suripan Sadi Hutomo ing tanggal 31 Juli wiwit taun 1977 lan taksih ngrembaka ngantos dina iki. Tujuwan anane PPSJ iki kanggo nglumpukake penulis, panyengkuyung, lan sutresna sastra Jawa uga ningkatake apresiasi saka diskusi, lokakarya, lan lomba. PPSJ uga melu nyengkuyung acara Nganggara wingi kanthi cara nekakake para penulis sastra Jawa modern kondhang, kayata Bapak Widodo Basuki.
Acara Nganggara iki kasil dirameni karo kurang luwih 100 mahasiswa sing nglumpuk
ana ing Joglo Fakultas Basa lan Seni, Universitas Negeri Surabaya. Mahasiswa sing teka
nyakseni penampilan saka kanca-kancane sing dadi pengisi acara ing Nganggara kuwi. Ana sing macakake geguritan, ana sing nampilake musikalisasi geguritan, ana sing mayang sekaligus macakake guritane, lan liya-liyane. Acara Nganggara pertama iki wis kasil dilakoni kanthi gayeng lan seneng.
Comments